“Ek is nou vir twee jaar ’n beskermheer van ons Afrikanerkultuur. Vir ander mense mag dit nie veel beteken nie, maar as ’n trotse Afrikaner beteken dit alles vir my,” sê Dricus “Stillknocks” du Plessis, middelgewigwêreldkampioen in gemengde gevegkuns en trotse beskermheer van die Voortrekkermonument (VTM) in Pretoria.
Du Plessis het Saterdag, 29 Maart die kanon Susanna op die VTM se Markplein onder luide applous van honderde opgewonde ondersteuners afgevuur. Die Monument, ’n graad 1-erfenisbaken, ondervind tans enorme druk op sy infrastruktuur, spesifiek wat kragvoorsiening betref, en Du Plessis het opnuut sy steun aan die VTM gegee.
Dricus du Plessis kom op die Voortrekkermonument se Markplein te voorskyn met sy UFC middelgewig-gordel oor sy skouer.
“Vir my om vandag hier te wees, is ’n groot eer en ek staan bankvas agter die Monument. Ek dink ook elkeen van julle is vandag hier omdat julle omgee vir ons geskiedenis en hierdie Monument, wat dit verteenwoordig en wat dit vir ons beteken. Dít waarvoor ons hier staan, moet ons beskerm met alles wat ons in ons het.”
Die kanonskoot was nie net ’n skouspel nie – dit is ook ’n harde betoog teen onbetroubare kragvoorsiening, kabeldiefstal en swak dienslewering. Die Monument ontvang nie ’n sent van die staat nie en vra met sy “Gee ons krag”-veldtog die publiek se steun om die droom van ’n selfstandige sonkragstelsel te verwesenlik.
Dricus du Plessis sê vir Dawid Brand, bedryfshoof van beeld en groei by die Voortrekkermonument dat hy bankvas agter hierdie kultuurerfenis staan.
Dit gebeur min dat Afrikaners rondom ’n individuele sportheld verenig. Tradisioneel trek ons in groot getalle saam om sportspanne se welslae te vier. Du Plessis het egter met sy sukses op die wêreldverhoog hierdie sportkultuur verander. Hy is van mening dat gemengde gevegkuns in Suid-Afrika op ’n glorieryke vooraand staan.
Dricus du Plessis sê vir die toeskouers dit is vir hom ‘n groot voorreg om ‘n beskermheer van die Voortrekkermonument te wees.
“Ons het vir die eerste keer in die geskiedenis van Suid-Afrika ’n wêreldkampioen en ek is oortuig dat daar in die nabye toekoms weer ’n wêreldkampioen te voorskyn sal kom. Die sport is groter as ooit in ons land, veral omdat dit nou soveel blootstelling kry. Dit is lekker om soveel ontluikende talent onder die jeug te sien en hoeveel jongmense tot die sport toetree,” sê Du Plessis.
Dricus du Plessis teken aandenkings vir sy ondersteuners.
“Dricus is enig in sy soort en simboliseer iets wat moeilik is om in woorde uit te druk. Hy is met reg ’n eietydse en nederige rolmodel en rigtingwyser,” sê Dawid Brand, bedryfshoof: beeld en groei van die VTM.
Dricus du Plessis was hoogs beïndruk met Zachary Katzenellenbogen se kunswerk van sy sportheld.
“Hy weerspieël die onwrikbare geloof en veggees wat so kenmerkend van Afrikaners is – nie ’n dors na konflik nie, maar ’n vasberadenheid om ’n kulturele landskap en erfenisskat te beskerm wat die moeite werd is om te verdedig. Sy steun, gewortel in ons geskiedenis maar tog vooruitstrewend, maak ’n reuseverskil.
Tydens die kanonskiet-geleentheid is die kleinspan ook deur perderuiters en ‘n voorlaaier vermaak.
“As Afrikaners sal ons nie toelaat dat ons erfenis ’n dowwe herinnering vir ons kinders en kleinkinders word nie. Die honderde mense, oud en jonk, wat vandag Monument toe gekom het om hul steun vir Dricus en die Monument met ’n klipharde knal te toon, is ’n bewys dat ons as ’n kulturele kollektief eienaarskap van ons erfenis wil én kan neem,” sê Brand.
Oom Paul en tannie Gezina het ook kom kyk hoe Dricus du Plessis vir Susanna afvuur terwyl hulle foto’s saam met die jongklomp geneem het.
Klik hier om die “Gee ons krag”-veldtog te steun: https://vtm.org.za/gee-ons-krag-projek/