Die Erfenissentrum is die ideale plek om meer te leer oor ons Afrikanererfenis en hoe om dit te bewaar. Die sentrum huisves die Toekomsbou Museumteater, waar die verhaal van die Afrikaner van 1902 tot vandag, oor 120 jaar in twaalf tonele, uitgebeeld word, asook ’n navorsingsbiblioteek en argief.

Die Afrikaner Navorsingsbiblioteek bevat meer as 15 000 boeke, tydskrifte, en pamflette insluitend ’n baie spesiale versameling waar jy jou familiegeskiedenis kan navors. Verdere tematiese versamelings sluit die Groot Trek, Rebellie van 1914-1915, Anglo-Boereoorlog, Suid-Afrikaanse kerke en dorpe, Suid-Afrikaanse erfenis, en Afrikanerkultuur, -taal en -musiek in.

In die Erfenissentrum se argief kan jy leer hoe dokumente, foto-, film- en oudiovisuele-versamelings veilig bewaar word vir die nageslag. Dit is ’n skatkis van inligting vir akademiese navorsers en bevat unieke tematiese versamelings wat onder meer die volgende insluit: Voortrekkermonument, Groot Trek, Anglo-Boereoorlog, Solidariteit, Afrikaner Broederbond, sowel as persoonlike versamelings wat ’n belangrike rol gespeel het in die daarstelling van die Afrikaner se kulturele en geskiedkundige erfenis.

Besoek gerus die Erfenisstigting se webblad om meer uit te vind. Klik hier.